حمل حبك ثكل

عالظهر شلته شكثر
وك حمل حبك ثكل
وبظهري ماضل ظهر
وشلون اجيك اتعبت
مالاكي الك اي اثر
النفسي ياما كلت
(محضوض من سافرت)
بالغربه شفتك اهل
وبغفله انته ارحلت
حسيت كلبي انفجر
صدكني صار شكثر مكروه طاري السفر
ما اكدر اوصل الك
مو لان جنحي انكسر
ماعندي اصلا جنح
وك هو هذا القهر
وماقصرت حاولت
وكلما احاول يرد
صوت اغنيه من البعد
(الخبر نفس الخبر
ماطرى علمن جديد
نفس همي والسهر
ومواجعن فيني تزيد)
مابييه حيل السهر
والسهر ضل بي حيل
ولابييه حيل الدمع
والدمع كوه يسيل
والليل؟..شحجي بعد
كل عمري صاير ليل
ماكادر اغفه مثل مايغفه باقي البشر
ولا اكلك اصبر لأن
كل يوم ساعه اثنعش
(بالليل مو بالظهر)
ماتبقه ذرة صبر
ابقه انخه شمس الصبح
والصبح يوصل ثمل
مايجي الوجه الفجر
(ويبات بره اعتقد يكضيهه شرب وسُكر)
موتني هذا الصبح
شلون انطرك بعد
وبجرحي طالع جرح
محتاج اشوفك صدك
والمس خدودك صدك
واحضن جفوفك واحس
بيهن صدك مو حلم لمن افز يحترك
كون من ابوسك تحس باروع طعم بالعشك
وكون من اشم ريحتك اشهك انفاسك شهك
صدكني لو اوصلك
(مايدك بعد الكلب)
كل جسمي يمك يدك
كل جسمي يمك ي د ك