راح أسافر & لاتسافر..:بين مطرقة صبّار الخفاجي وسندان نور البدر

قصيدة راح اسافر من كلمات الشاعر صبار الخفاجي من محافظة( ذي قار )

راح اسافر
راح ابيع العندي واشتري اوراق التذاكر
وراح الم الذكريات واطوي كل ذيج الدفاتر
وراح اعوف أمي وابوي واصرخ بكل صوتي افاً حتى اعيش بدين كافر
لايهز بية الحنان ولاتحركني المشاعر
وازرع بكلبي القساوة واشتغل دفان وي اهل المكابر
راح اسافر
لالجل متعة ولاجوع وحصار ولاني ثائر
لكن بعيني شفت فوك الرصيف انداست اهواية ضمائر
راح اسافر
وادري اودع عيون تبجي وتشتهي لماكاي باجر
وادري روحي تحب طبعهه وكوة تتحمل خناجر
وادري اجر حسرة يتيم وادري وشلت الصبر بوشالة اكابر
لكن الحالة ترادت كمت اشوف ماتجبر خواطر
راح اسافر
راح اسوي الخيط دربي والظم اجروحي لظم سبحة مسافر
وبيدي اسبح خرزة خرزة وكل جرح بجروحي انغزه ومايهمني الي نزف والدمة خاثر
المهم عندي السفر بس كون اسافر
وكتم بروحي قصيدة تبات ويه احساس شاعر
والقصيدة كلشي يبدي من الصفر جدي وأنت تصير تاجر



الرد على القصيدة من كلمات نور البدر
لاتسافر
يل تريد اتبيع دنياك وتهاجر
ويل تعوف أرسوم اهنلة وتنغمر وسط الملذة بدين كافر
منو يغسل جرح ابوك الكظة عمره بوشلة دموعة يكابر
ومنو يمسح دمع ذيج الخلصت نزف المشاعر
لا يصابر لاتسافر
الكاع بور وصبخت منو ألهه لو ردت صابر تسافر
منو يفضح تاجر الدولار والذل نفسه الهم بالقوافي وبالشعر فوك المنابر
أصبرلهه وفضي خلكك خلي طبعك طبع ثائر
ماينام أعلة المذلة وماتهزك ها الرعيع العوز ظكهه وقررت بيع الظماير
خلهه تنداس الظماير
بلجي تصحه اعله الوكت صاير خناجر
بلجي تصحه وينجبر كسر الخواطر
وشرد اكلك وانت شاعر
تدري جمر أكلوبنه التحسبه نامت من يطك يصبح شرار
وتدري بينه اربات اهلنه
الدكو أعروش الطغاة وصاغوة ولحنو اجمل قرار
وتدري بينه بكل كلب ملجوم نحمل قطرة من دم الحسين ...
وثورة الطف تبقى تذكار الأزل ابشع جريمة ...
مغلفة يلفة الشنار
توعه زين وفكرلهه الدنية مو دفتر تذاكر
الدنية مو ملكك يصابر
دنيتك صارت ملك كل القوافي وجلمة محسوبة أعله شاعر